नबिन चौधरी , महोत्तरी 
जलेश्वर नगरपालिका–११ लाई बालविवाहमुक्त वडा घोषणा गरिएको छ । रतौली युवा क्लबको सक्रियता र स्थानीय सरोकारवालाको सहयोगमा सम्पन्न कार्यक्रममा मधेस प्रदेशका श्रम, रोजगार तथा यातायात मन्त्री कौशल किशोर रायले मधेस प्रदेश अझै पनि शिक्षा, स्वास्थ्य र गरिबी जस्ता सूचकाङ्कमा पछाडि रहेको भन्दै शिक्षा क्षेत्रमा जोड दिनुपर्ने आवश्यकता औंल्याउनुभयो । उहाँले मधेसमा अहिले पनि बालविवाहको अवस्था भयावह रहेको उल्लेख गर्दै शिक्षा सुधार नगरी प्रदेशको समग्र विकास सम्भव नहुने धारणा राख्नुभयो ।

त्यस्तै नेपाली कांग्रेसका वरिष्ठ नेता बजरंग नेपालीले बालविवाहका कारण परिवारदेखि समाजसम्म अनेकौँ समस्या उत्पन्न हुने भन्दै यसलाई रोक्न सबै सरोकारवालाको साझा प्रयास आवश्यक रहेको बताउनुभयो ।

उहाँले छोराछोरी दुवैलाई शिक्षा दिन सकिएमा परिवार मात्र नभई देशको नाम उज्यालो पार्न सकिने धारणा राख्नुभयो ।
कार्यक्रमलाई सम्बोधन गर्दै जसपा नेपालका नगर अध्यक्ष सन्तोष साहले छोरीहरूलाई शिक्षामा पहुँच दिलाउन सके समाजका विभिन्न विकृति स्वतः अन्त्य हुने विश्वास व्यक्त गर्नुभयो ।

उहाँले शिक्षा नै समानता र अवसरको आधार भएको भन्दै छोरीलाई पनि छोरा सरह शिक्षाको अवसर दिनु सबैको दायित्व भएको बताउनुभयो ।

कार्यक्रम मा बोल्दै रतौली युवा क्लबका कार्यकारी निर्देशक वैधनाथ चौधरीले बालविवाहका कारण कतिपयलाई सरकारी सेवा–सुविधा लिन समेत समस्या हुने तथ्य प्रस्तुत गर्दै यसलाई अन्त्य गर्न समाजका सबै तहको जिम्मेवारी हुने बताउनुभयो । बालविवाहमुक्त वडा घोषणा सम्भव बनाउन सहयोग गर्ने सबैलाई धन्यवाद दिंदै उहाँले यस अभियानलाई निरन्तरता दिन क्लब प्रतिबद्ध रहने प्रतिवद्धता व्यक्त गर्नुभयो ।

बालविवाहमुक्त वडा घोषणा कार्यक्रममा मन्त्री, राजनीतिक दलका नेता, जनप्रतिनिधि, सामाजिक अभियन्ता, विद्यार्थी तथा सर्वसाधारणको उल्लेख्य उपस्थिति रहेको थियो । सहभागीहरूले यसलाई समाज रूपान्तरणतर्फको महत्वपूर्ण कदमका रूपमा लिएका थिए ।